உள்ளாட்சி தேர்தல் ஏற்பாடுகள் : கலெக்டர்களுடன் ஆலோசனை

உள்ளாட்சி தேர்தல் ஏற்பாடுகள் : கலெக்டர்களுடன் ஆலோசனை

         உள்ளாட்சி தேர்தல் ஏற்பாடுகள் குறித்து, மாவட்ட கலெக்டர்களுடன், மாநில தேர்தல் கமிஷன் ஆலோசிக்க உள்ளது. தமிழகத்தில், உள்ளாட்சி தேர்தலை, ஜூலை மாதத்திற்குள் நடத்தி முடிப்பதாக, உயர் நீதிமன்றத்தில், மாநில தேர்தல் கமிஷன் உறுதி அளித்துள்ளது.

       ஆனால், வாக்காளர் பட்டியல் தயாரிப்பு உள்ளிட்ட பணிகளில், மாவட்ட தேர்தல் நடத்தும் அலுவலர்களான, கலெக்டர்கள் ஆர்வம் காட்டவில்லை. தற்போதைய சூழலில், தேர்தல் நடக்க வாய்ப்பில்லை என, அவர்கள் நம்புவதே இதற்கு காரணம். இது, ஒரு புறம் இருந்தாலும், உயர் நீதிமன்றத்தின் கண்டனத்தில் இருந்து தப்ப, அனைத்து ஏற்பாடுகளையும், மாநில தேர்தல் கமிஷன் துவங்கி உள்ளது.

இது குறித்து, தேர்தல் கமிஷன் அதிகாரி ஒருவர் கூறியதாவது: உள்ளாட்சி தேர்தலை நடத்துவதில், மாநில தேர்தல் கமிஷனுக்கு எந்த பிரச்னையும் இல்லை. அரசிடம் இருந்து, இட ஒதுக்கீடு பட்டியல் இன்னும் கிடைக்கவில்லை; வாக்காளர் பட்டியல் தயாரிப்பு பணிகளும் முடியவில்லை. ஏப்., 4ல், திருச்சி சென்ற, மாநில தேர்தல் கமிஷனர் மாலிக் பெரோஸ்கான், திருச்சி, அரியலுார், பெரம்பலுார் மாவட்ட, உள்ளாட்சி அதிகாரிகளுடன் ஆலோசனை நடத்தினார். தொடர்ந்து, ஏப்., 20க்கு பின், மண்டல வாரியாக, மாவட்ட கலெக்டர்களுடன் ஆலோசனை நடத்த உள்ளார்.இவ்வாறு அவர் கூறினார்.